БНСУ-ЫН УЛСАН ХОТЫН НАМ ДҮҮРГИЙН ТӨЛӨӨЛӨГЧИД ХАН-УУЛ ДҮҮРГИЙН СУРГУУЛЬ, ЦЭЦЭРЛЭГИЙН ҮЙЛ АЖИЛЛАГААТАЙ ТАНИЛЦЛАА

БНСУ-ын Улсан хотын Нам дүүргийн сургуулийн өмнөх боловсролын салбарын төлөөлөгчид өнөөдөр Хан-Уул дүүрэгт айлчиллаа. Хан-Уул дүүрэг Улсан хотын Нам дүүрэгтэй хамтын ажиллагаа, хоёр дүүргийн хооронд байгуулсан санамж бичгийн хүрээнд сургуулийн өмнөх боловсролын салбарт туршлага солилцох, дүүргийн хэмжээнд цэцэрлэгүүдэд тулгамдаж буй асуудлуудад бодлогын түвшинд хамтарсан шийдвэрүүдийг гаргаж, шинэлэг аргачлалуудыг нэвтрүүлэх тал дээр онцгой анхааран ажиллаж байна.Энэ удаагийн уулзалтын үеэр тус дүүргийн улсын цэцэрлэгүүдийн хамтын холбооны дарга Со Гёнгук, хувийн цэцэрлэгүүдийн холбооны дарга Гым Хысок мөн Гэр бүлийн цэцэрлэгүүдийн холбооны дарга Квон Хэжон тэргүүтэй төлөөлөгчид Хан-Уул дүүргийн 46 дугаар цэцэрлэг, хувийн хэвшлийн Номин цэцэрлэг, Хосе Мартын нэрэмжит 52 дугаар сургуулийн үйл ажиллагаа, сургалтын орчин нөхцөлтэй танилцаж, туршлага судаллаа.